Kennisgewing:

Indien die inligting van 'n veld nie beskikbaar is nie, vul asseblief die leemte met " NVT "

Aanmeldingsvorm

Kliek hier om die aanmeldingsvorm aftelaai


Acrobat Reader sal
benodig word.
As jy dit nie het
nie kan dit
hier afgelaai word.

Of

Vul die aanlynvorm hier in.

Kontak Besonderhede

Telefoonnommer:
  012 343 6240
Selfoonnommer:     084 271 4777
Faksnommer:           086 210 6920
Adres:                           Posbus 1969
                                         Silverton 
                                         0127

Bankbesonderhede

Bank:                      Standard Bank
Rek. Tipe:             Tjek
Rek. No:                 27 124 0490
Takkode:               01 05 45
Verwysing NB!   Projek2010

Donasies vir die instandhouding en verdere ontwikkeling van die tuiste sal waardeer word.

Aantal Besoekers

free counters

Bejaarde vrou in Benoni vermoor, man beseer

2010-02-15 11:37


Mnr. José Vieira voor die huis waar hy en mev. Jannecke op haar vermoorde ma en erg beseerde pa afgekom het.

René-Jean van den Berg en Wolfram Zwecker

Die moordenaars van ’n bejaarde vrou van Northmead, Benoni, was teen gister nog op vrye voete.

Mev. Alice Botha (75) is in die gang van haar huis dood weens ’n hou teen die kop.

Haar man, Jack, (ook 75) word in die hoësorgeenheid van die Unie-hospitaal in Alberton behandel waar sy toestand gister nog as bedenklik bestempel is.

’n Onbekende aantal mense het die egpaar Vrydagnag in hul huis in Negende Laan oorval, het konst. Ron Nchali, polisiewoordvoerder, gesê.

Die egpaar se dogter, mev. Antoinette Jannecke, het op hulle afgekom toe sy en haar vriend, mnr. José Vieira, van ’n fliek by die huis gekom het.

Vieira het gesê toe hulle omstreeks 23:00 by die huis kom, was die garagedeur oop en was daar bloed op die deur se handvatsel.

“Dit was alles vreemd. Antoinette is eerste by die huis in en het haar pa op die vloer in die kombuis gekry.”

’n Vreemde man het uit een van die vertrekke kombuis toe gekom om by die huis uit te gaan, het Vieira gesê.

“Hy het ’n baie welkome houding gehad, asof hy die volste reg het om in die huis te wees.”

’n Struweling het buite die huis tussen Vieira en die vreemdeling ontstaan, maar die vreemdeling het hom glo nie teëgesit nie.

“Antoinette het intussen histeries begin gil en ek het besef sy is alleen in die huis. Ek het toe net ingehol en hy het weggekom.”

In die gang na die slaapkamer het mev. Botha se lyk gelê.

Konst. Godin Nyathi, polisiewoordvoerder, het gesê dit is nog nie bekend wat alles gesteel is nie, maar ’n plastieksak met selfone en juwele is in die tuin opgetel.



Lees die oorspronklike koerantberig hier

6 Weke, 6 moorde

2010-02-12 01:26



mnr. Theunis (85) en mev. Suzie (83) Venter

Hilda Fourie

Ses bejaardes is die afgelope ses weke in Pretoria vermoor.

Gisteroggend is die lyke van ’n bejaarde egpaar in hul huis in Mayville gevind.

Mnr. Hein Engelbrecht (33) het gisteroggend op die lyke van sy oupa en ouma, mnr. Theunis (85) en mev. Suzie (83) Venter, afgekom.

Die egpaar, wat verlede week hul 59ste huweliksherdenking gevier het, was vermoedelik al sowat 12 uur dood toe hulle gevind is.

Mnr. Venter, wat erg aangerand is, het op sy maag in die sitkamer gelê. Sy vrou, wat gesukkel het om te loop nadat sy vroeër ’n beroerte gehad het, is vermoedelik verwurg. Engelbrecht het haar lyk in die gang gekry.

Die vermoede dat sy verkrag is, sal eers by ’n lykskouing bepaal kan word.

Slegs die egpaar se ou Volkswagen Kombi (met registrasienommer KMC 163 GP), ’n Play-Station2 en ’n DVD word vermis.

Dit is nie bekend hoeveel rowers die egpaar oorval het nie.

Insp. Wanda Olivier, polisiewoordvoerder, het gister gesê Engelbrecht, ’n veiligheidswag, het omstreeks 06:15 ná sy nagskof by die huis aangekom.

Hy woon saam met sy grootouers in dié huis op die hoek van Louis Trichardtstraat en Mortimerlaan, oorkant die Laerskool Mayville.

“Toe hy by die huis kom, het die hek wawyd oopgestaan, die veiligheidshek van die stoep was oop en die Kombi het nie onder die afdak gestaan nie,” het Olivier gesê.

“Hy het sy motorfiets op die gras geparkeer en die huis binnegestorm waar hy op sy ouma en oupa se lyke afgekom het.

“Hy het hulle probeer wakker maak, maar hulle wou nie wakker word nie.”

Die egpaar se boerboel, Luna, het onder die kombuistafel gelê toe polisielede op die toneel kom. Sy is blykbaar erg geskop en geslaan en het nie beweeg nie totdat die polisie die toneel klaar ondersoek het.

Me. Yvette Engelbrecht (29) het in trane gesê haar oupa en ouma wou nooit na ’n ouetehuis gaan nie. Hulle wou nie eens by haar in Kempton Park gaan woon nie. “My oupa het altyd gesê hulle sal doodgaan as hulle in ’n ouetehuis gaan bly. Hulle het baie goeie harte gehad.”

’n Saak van huisroof en moord word ondersoek. ’n Klag van verkragting sal moontlik later bygevoeg word.

Bejaardes wat vermoor is:

    * 3 Februarie: Dr. Francois Steenkamp (71), ’n afgetrede kardioloog wat jare lank in die Medi-Clinic-harthospitaal in Arcadia gewerk het, is wreed in sy huis in die Newlands Park-aftreeoord in Pretoria vermoor. Steenkamp is glo erg aangerand, sy kop is stukkend geslaan en sy hande was agter sy rug vasgebind.

    * 25 Januarie: Me. Elsa Blignaut se lyk is twee dae ná haar 83ste verjaarsdag in haar bed in haar huis in Nieuw Muckleneuk, Pretoria gekry. Sy is vermoedelik verwurg.

    * 13 Januarie: Mev. Ria van den Bergh (65) is helder oordag in haar huis in Hermanstad, Pretoria deur rowers oorval en doodgeslaan.

    * 8 Januarie: Mev. Kitty Botha (83) is in haar huis in Lyttelton, Centurion oorval, vasgebind, gewurg en doodgeslaan voordat haar huis aan die brand gesteek is.

    * November 2009: Kol. (afgetree) Piet Swemmer (89) is in sy huis in Waterkloofrif, Pretoria met ’n hamer doodgeslaan.

- Beeld


Lees die oorspronklike koerantberig hier

Hartdokter vermoor

2010-02-04 02:02


Mev. Willemina Habile (60), dr. Francois Steenkamp (71) se huishulp wat gisteroggend op sy lyk in sy huis in die Newlands Park-aftreeoord in Pretoria afgekom het. Foto’s: theana calitz


’n Afgetrede kardioloog wat jare lank in die Medi-Clinic-harthospitaal in Arcadia gewerk het, is wreed in sy huis in die Newlands Park-aftreeoord in Pretoria vermoor.

Dr. Francois Steenkamp (71) is glo erg aangerand, sy kop stukkend geslaan en sy hande agter sy rug vasgebind.

Mev. Willemina Habile (60), Steenkamp se huiswerker, het gister omstreeks 08:30 op sy lyk afgekom.

Kapt. Colette Weilbach, polisiewoordvoerder, het gesê Steenkamp het ’n groot wond aan sy kop gehad en dit lyk of hy met sy moordenaars gestoei het.

Volgens Weilbach was die huis erg geplunder en byna elke hangkas en laai uitgegooi. Daar was egter geen teken van gedwonge toegang nie.

Sy het gesê die moordenaars het met Steenkamp se wit Toyota Tazz gevlug.

Volgens ’n betroubare bron is verskeie meubels in die huis rondgeskuif of -gegooi.

Habile het gister aan Beeld gesê toe sy daar kom, was die veiligheidshek oop en die voordeur op ’n skrefie oop.

“Ek werk gewoonlik Maandae vir mnr. Steenkamp, maar vanoggend moes ek kom, want daar was komberse wat ek moes uithang. Ek het die deur oopgestoot en ingestap. Ek het geroep, maar hy het nie geantwoord nie.

“Toe ek in die kamer kom, het ek voete onder die bed sien uitsteek,” het Habile vertel.

Weilbach het gesê Habile het na die verpleegsters in die aftreeoord gehardloop en hulle het Steenkamp se kinders en die polisie ontbied.

Dié moord is gepleeg kort nadat die onderneming wat verantwoordelik is vir veiligheidsmaatreëls in die oord in die pad gesteek is omdat die onderneming glo “te slap” is.

“Dié man was een van die beste hartspesialiste in Pretoria en nou is hy dood,” het mnr. John Corbitt (72), Steenkamp se buurman, gesê.

Volgens hom het twee mans twee weke gelede eenvoudig by die hoofhek verby die veiligheidswagte gestap en ’n vrou se handsak, selfoon en juwele uit haar huis gesteel.

“Ons (die inwoners) het besluit om ontslae te raak van die veiligheidsonderneming, want hulle het volgens ons nie hul werk gedoen nie. Dié maatskappy sal net tot einde vandeesmaand hier wees en dan neem iemand anders oor.”

Habile het gesê toe sy vir Steenkamp begin werk het, het sy kinders gewaarsku dat hy “baie parmantig” kan wees.

“Maar ons het mekaar lekker verstaan.

“Nou is hy dood, maar ek weet hy is by die Here.”

Steenkamp het die afgelope vyf jaar in die oord gewoon.

Sy twee seuns en dogter wou gister by sy huis nie met die media praat nie.

Weilbach het gesê die Sunnyside-trio-taakspan ondersoek ’n klag van huisroof en moord. Mense met inligting oor die voorval kan die polisie se noodnommer 10111 bel.

- Beeld


Lees die oorspronklike koerantberig hier

‘Julle bliksems!’ toe word pa van 2 doodgeskiet



Buks Viljoen

“Dankie, liewe Jesus, vir ons mooi nuwe huis en dat ons so gelukkig is.”

Minute nadat die vyfjarige Lauren Bezuidenhout van Nelspruit die afgelope naweek dié gebedjie opgesê het, is haar pa, Bossie (45), doodgeskiet.

Kort voor die moord het mnr. Bezuidenhout, sy vrou, Karen (39), en hul kinders, Lauren en Jarrod (11), saam in die kombuis melkskommel gedrink. Mnr. Bezuidenhout se ma, Tina (65), was elders in die huis doenig.

Die gesin het Saterdag in hul nuwe dubbelverdiepinghuis in die gesogte Shandon Estates in Nelspruit ingetrek.

Mnr. Bezuidenhout is omstreeks 20:30 na die onderste verdieping van die huis om Jarrod in die bed te gaan sit.

In ’n stadium het mev. Bezuidenhout gehoor hoe haar man skree: “Julle bliksems!” het mev. Karin Visagie, ’n vriendin van die gesin, gister aan Beeld vertel.

Hy het hom vermoedelik teen inbrekers vasgeloop. Toe het ’n skoot geklap. Hy is in die nek getref en is op slag dood.

“Skaars ses uur voor sy sinnelose moord het ons nog op die huis se stoep gestaan en het hy vir my gesê hoe gelukkig hy nou is,” het Visagie gesê.

Mev. Bezuidenhout word oormôre 40. “Bossie sou haar as verrassing vir ’n romantiese naweek wegneem. Pleks van partytjie hou beplan ons nou sy begrafnis.”


Visagie se man, Ronnie, was Bezuidenhout se boesemvriend. Die twee het mekaar 35 jaar geken. Bezuidenhout, wat in 1984 ’n matrikulant aan die Hoërskool Rob Ferreira in Witrivier was, het ’n jaar gelede ’n onderneming in Nelspruit by mnr. Visagie gekoop.

“Dit was sy lewensdroom om terug te kom Nelspruit toe,” het mev. Visagie gesê .

Bezuidenhout het in Mei 2009 van Pretoria, waar hy in Silver Lakes gebly het, Nelspruit toe getrek. Sy gesin het in November, nadat die skole gesluit het, ook daarheen verhuis. Hulle het Saterdag uit hul huurhuis na hul nuwe droomwoning getrek.

Supt. Gerrie Agenbag, speurtakbevelvoerder van die polisie op Nelspruit, het gesê hulle vermoed Bezuidenhout is met ’n rewolwer doodgeskiet. ’n Koeëlpunt is in die moordkamer gekry, maar geen doppie nie.

Volgens Agenbag is dit nie seker hoeveel aanvallers daar was nie. “Spore wat ons buite die huis gekry het, wys dit kan moontlik twee of drie wees.”

Enigiemand met inligting kan Agenbag by 013 759 1108 bel.

Shandon Estates, wat bemark word as ’n hoë-sekuriteitskompleks, het die afgelope twee maande onder ’n vlaag van misdaad deurgeloop.

Mnr. Charles Venter, ’n oud-burgemeester van Nelspruit en buurman van die Bezuidenhouts, is laat verlede jaar self in sy huis hier aangeval en erg aangerand.

- Beeld



Lees die oorspronklike koerantberig hier.



Man voor sy tweeling vermoor

2010-01-18 23:01


Virginia Keppler

Drie gewapende rowers het ’n tienjarige tweeling van Midrand met vuurwapens teen die kop aangehou en toe hul pa voor hul oë dood­geskiet.

Mnr. Kobus Snyman (42) is in die hart geskiet. Sy ouer dogter, Lenika (16), en sy vrou, Leenette (38), het ook gesien hoe hy geskiet word.

Die rowers het Snyman se skoonma en skoonsuster, mev. Shirley (57) en me. Debbie van der Vyver (34), en ’n vriendin, me. Eureke Kriel, ook aangehou.

Die vroue en kinders het Vrydag omstreeks 22:30 op die stoep van Snyman se huis in Allanweg in Glen Austin gesit en kuier toe die rowers toeslaan.

Snyman was in die sitkamer waar hy voor die TV aan die slaap geraak het.

“Drie mans in blou baadjies het aangeloop gekom. Ek het nog gedink dit is die polisie, maar toe sit een sy vinger op sy lip en wys ons moet stilbly,” het me. Van der Vyver gister vertel.

“Hulle het seker oor die heining gespring, want die hekke was gesluit. Hulle het hul vuurwapens teen die tweeling se koppe gedruk. Ons het almal begin skreeu.”

Dis toe dat Lenika haarself byna bo-oor die tweeling gooi en hulle in haar arms toevou om hulle te probeer beskerm.

“Ek het hulle (die rowers) in die oë gekyk en gesê: ‘Nee!’ Toe skreeu ek: ‘Dad’!” het sy vertel.

Snyman het wakker geword. “Maar nog voordat hy die deur (dis ’n glasdeur) kon oopmaak – sy hand was op die handvatsel – het die een rower hom geskiet,” het me. Van der Vyver gesê.

Snyman het nogtans na die slaapkamer begin hardloop om vermoedelik sy pistool te gaan haal, maar het op die trappe dood neergeval.

Die rowers het ’n skootrekenaar en selfone gevat “voordat hulle doodkalm weggestap het”, het me. Van der Vyver gesê.

Volgens haar het haar swaer “soos ’n engel” gesing en was hy lid van die Centurion-kamerkoor.

Volgens mev. Van der Vyver het sy die gesigsuitdrukking van die man wat haar skoonseun geskiet het, gesien “en ek kon sien dit is nie die eerste keer dat hy moor nie”.

“Ek wil hê die minister van polisie moet my kom sê wat hy gaan doen. Gaan die regering vir die kinders sorg?” wou sy weet.

Snyman se vrou is getraumatiseer en toon volgens haar ma in dié stadium geen emosie nie.

“Dit is asof Leenette in ’n slegte droom is.”

Mnr. Kevin MacInnest (44), ’n familievriend wat eerste op die toneel was, het gesê dit is skrikwekkend dat Suid-Afrikaners ná 15 jaar van demokrasie in vrees leef. “Niemand van ons is bullet proof nie. Kobus was nie ’n bedreiging vir hulle nie.

“Hy was ’n groot, sagte teddiebeer van 110?kg. Hy het elke dag met ’n ‘Shanana’-glimlag (’n breë glimlag) begroet,” het MacInnest gesê.

Die familie het gister die Anderson-groep, ’n maatskappy waar Snyman onlangs begin werk het, en vriende en familie van so ver as Australië bedank vir hul ondersteuning en gebede.

Snyman laat ook ’n seun, Tyron Snyman (14), agter.

Insp. Mmakgomo Semono, polisiewoordvoerder, het bevestig dat die polisie die moord en gewapende rooftog ondersoek.

- Beeld



Lees die oorspronklike koerantberig hier

Taxi eis meisie
2010-01-14 00:46


Thinus Dippenaar

’n Meisie van Vereeniging wat verlede week haar matriekuitslae gekry het, is dood nadat ’n taxi haar op haar negentiende verjaarsdag doodgery het.

Me. Yvonne van Deventer was Maandag saam met mnr. Martin Posthimus (20), haar kêrel, op pad na haar ouerhuis nadat hulle haar verjaardag by ’n restaurant gevier het.

Sy het verlede week haar matriekuitslae gekry. Die ongeluk het skaars 2km van haar ouerhuis af gebeur.

Posthimus het ernstige kopbeserings opgedoen.

Haar ouers, mnr. Tommy en mev. Brenda van Deventer, het van die ongeluk gehoor toe Yvonne, hul oudste dogter, nie soos afgespreek om 23:00 tuis was nie. Mev. Van Deventer het Yvonne op haar selfoon gebel, maar ’n paramedikus het geantwoord en haar die slegte nuus meegedeel.

’n Taxi het vermoedelik nie by die vierrigting-stopteken op die Boy Louw- en Houtkopweg-kruising in Vereeniging stilgehou nie en die motor getref waarin die paartjie gery het. Yvonne is op slag dood,

Posthimus, ’n vakleerling by ’n ingenieursmaatskappy in Vanderbijlpark, is deur paramedici van ER24 en Emfuleni-nooddienswerkers op die toneel behandel voordat hy per ambulans na die Vereeniging Medi-Clinic geneem is.

Volgens mnr. Johannes van Deventer (48), Yvonne se oom, is Posthimus eergister geopereer om bloeding op sy brein te verlig.

“Hy word in die waakeenheid onder verdowing gehou totdat sy toestand verbeter,” het Van Deventer gesê.

“Ons bid vir Martin en hoop en vertrou hy sal volkome herstel.”

Die taxibestuurder het ligte beserings opgedoen en is na die Sebokeng-hospitaal geneem.

Die Vereeniging-polisie ondersoek ’n saak van strafbare manslag.

Volgens Van Deventer was Yvonne ’n matriekleerling aan die Hoërskool Overvaal in Vereeniging en sy het ’n week gelede gehoor dat sy matriek met universiteitsvrystelling geslaag het.

Sy wou grafiese ontwerp studeer, maar wou eers vir ’n jaar werk.

“Ons gaan die opgewekte, altyd laggende kind wat graag stories vertel het, baie mis,” het Van Deventer gesê.

Dit gaan volgens hom “goed met haar pa en ma, maar hulle is erg getraumatiseer oor die verlies van hul dogter”.

Buiten haar ouers, word sy oorleef deur haar broers, Warren (22) en Tommy (20), en susters, Elsabie (17) en Danielle (16).

Die sussies is albei leerlinge aan die hoërskool waar hul ousus pas gematrikuleer het.

Haar verassingsdiens word môre om 11:00 in die Volle Evangelie Kerk in Vanderbijlpark gehou.

- Beeld


Lees die oorspronklike koerantberig hier

Vrou (64) in haar huis aangeval, vermoor




2009-12-10 09:46

André Damons

’n Duitssprekende vrou is in haar huis in Rooseveltpark, Johannesburg, vermoor.
 
Haar vriend, ’n bekende motorhandelaar, is in Januarie langs die N14-hoofweg vermoor.

Die 64-jarige vrou is vermoedelik tussen eergister 11:00 en gister 08:00 doodgeslaan deur iemand wat sy geken het.

Sy het alleen in die huis in Anton van Wouwweg gebly en glo haar pensioengeld daar versteek.

Haar naam is nog nie bekend gemaak nie omdat haar familie nog van haar dood in kennis gestel moet word.

In Januarie is mnr. Dieter Fürrutter (65), ’n vriend van die vrou en eienaar van Dieter Car Sales, vermoor toe hy sy vriend mnr. Wolfram Ebel, wie se motor op die N14 naby die Diepsloot-plakkerskamp onklaar geraak het, gaan help het.

Gister het die vrou se bure onraad vermoed toe hulle haar nie soos gewoonlik in die tuin sien werk het nie. Hulle het die polisie gebel, het insp. Bokkie Keulder, polisiewoordvoerder, gesê.

Dit wil voorkom of haar aanvallers haar in die badkamer oorval en oor die kop geslaan het.

“Toe die polisie by die huis ingaan, het hulle die vrou dood op die badkamervloer aangetref. Ons weet net sy is oor die kop geslaan, maar weet nog nie waarmee nie,” het Keulder gesê.

’n Selfoon, juweliersware, beursie en kontant word uit die huis vermis. Keulder het gesê die aanvallers het die huis omgekrap op soek na goedere om te steel.

Die polisie vermoed die vrou het haar moordenaars geken. Daar was geen teken van ’n inbraak nie.

’n Provinsiale ondersoekspan van die polisie ondersoek die moord.




Lees die oorspronklike koerantberig hier

‘My man het die koeël vir ons gevat’





2009-11-23 00:46

Susan Cilliers

Twee kinders het verlede Donderdagoggend tjoepstil onder ’n kombers weggekruip nadat huisrowers hul pa in die maag geskiet het.

Mnr. Danie Labuschagne (37) van Brakpan aan die Oos-Rand is enkele ure later aan inwendige bloeding dood.

“Hy het vir my gekyk asof hy wou vra ‘help my’,” het Labuschagne se dogter, Monique (12), gister vertel.

Labuschagne sou Kersdag 38 jaar oud geword het, het sy hartseer vrou, Madelein (37), vertel van haar hoërskoolliefde wat “haar alles was”.

Die rowers het hul sitkamer se skuifdeur Donderdag in die vroeë oggendure oopgedwing.

“Ek en Danie het wakker geword toe hulle in ons kamer was.

“Drie mans het met flitse op ons geskyn en gesê: ‘Get up, get up’.

“Hulle het die komberse van ons afgeruk. Toe ek en my man opstaan, het een rower hom in die maag geskiet. Danie het: ‘Eina’ geskree en geval,” het me. Labuschagne vertel.

Monique en Danie (14) het wakker geword toe hul pa geskiet is.

“Ek het gebid dat die Here sy lewe spaar,” het Danie jr. gister vertel. Monique het ná haar pa se pynkreet net “gehoop dis nie ernstig nie”, het sy vertel.

Sy is na haar boetie se kamer waar die twee doodstil teen mekaar onder ’n kombers lê en wegkruip het. Die rowers het onder meer juwele, selfone, klere en ’n skootrekenaar gesteel.

“My man het die bullet vir ons gevat. Hy het nie teëgestribbel nie en selfs aan die boewe verduidelik waar die skootrekenaar is. Ons het hulle selfs sirs genoem,” het me. Labuschagne vertel.

Sy het aan die voetenent van die bed gesit en vir haar man gesê: “Bid net my man, bid net.”

Nadat die rowers die huis geplunder het en weg is, het mnr. Labuschagne gepleit: “Maak net gou, maak net gou.” Sy familie wou hom optel en in ’n motor hospitaal toe neem, maar hy het gesê hy het te veel pyn en dat hulle hom moet neersit. Hy is in ’n ambulans hospitaal toe, waar hy net ná 04:00 Donderdagoggend dood is. “Ek het aan hom gevat en hom vertel hoe lief ek hom het,” het me. Labuschagne gister vertel.

Haar man was ’n topfiks elektrisiën wat aktief by die kerk betrokke was.

Hy was ’n marathon-atleet wat onder meer die Comrades gehardloop het. Danie jr. en sy pa het elke oggend 5 km gedraf. “Ek het my pa reeds belowe ek sal steeds elke oggend gaan draf.

“Hy wou altyd aan die Ysterman-kompetisie deelneem en ek het besluit ék gaan dit nou doen as ek 18 is.”

Danie en Monique is albei besig met eksamens.

Danie sr. “het vir die Here geleef”, het sy vrou gesê. “Hy was reguit, behulpsaam, huislik en het gehou van kamp.”

Monique het gesê haar pa “was lief” vir hulle en het hulle “gelukkig gehou”.

Kapt. Mack Mngomezulu, polisiewoordvoerder, het bevestig ’n saak van huisroof en moord word ondersoek, maar die misdadigers is nog soek.

Mnr. Labuschagne word Donderdag-oggend uit die Christian Family Church International in Boksburg begrawe.

- Beeld




Lees die oorspronklike koerantberig hier

Ek kan nie sonder hom lewe nie,’ gil sy




2009-11-01 23:10

Fanie van Rooyen

‘Asseblief Here, moet hom nie wegvat nie. Ek kan nie sonder hom lewe nie.”

So het mev. Anita Woest (50) eergister geskreeu oomblikke nadat haar man deur een van sowat tien gewapende rowers by die Klipeiland-slaghuis buite Bronkhorstspruit doodgeskiet is.

Die bende het helder oordag by die slaghuis op die R25-pad toegeslaan.

Mnr. Pieter Woest (55), bestuurder van die slaghuis, het kort tevore saam met sy vrou in die slaghuis gewerk voordat ’n werker vir hom kom sê het iemand beroof die gebou langsaan.

Hy het sy rewolwer gegryp en in die parkeerterrein in drie van die rowers vasgehardloop.

Hy het op die rowers losgebrand en vermoedelik een rower twee keer getref voordat ’n vierde rower, wat agter ’n pilaar versteek was, hom in die rug en in die kuit getref het.

“Toe ek by hom kom het daar reeds bloed by sy neus en mond uitgekom,” het ’n emosionele mev. Tokkie Human (53), ’n kassier wat deur die rowers aangehou is, gister gesê.

Woest is vermoedelik in die hart getref en is op die toneel dood.

Kapt. Sipho Zulu, polisiewoordvoerder, het gesê die rowers het omstreeks 12:30 in ’n roomkleurige Toyota Quantum-minibussie by die slaghuis toegeslaan.

Mev. Suzette Olivier, eienaar van die slaghuis, het saam met Human in dié gebou agter die toonbank gewerk toe die rowers daar ingebars het.

“Ek was besig om ’n klant te bedien toe ’n man met ’n swart baadjie ingestap en ons veiligheidswag teen die grond gegooi het,” het Human gesê.

Dié rower het ’n enkele skoot teen die grond langs die veiligheidswag geskiet.

“Suzette het deur toe gestap om die man te konfronteer toe ’n tweede rower ingestap en haar met sy vuurwapen agter die toonbank ingedwing het.”

Een van die rowers het langs Human stelling ingeneem en ’n handwapen in haar sy gedruk terwyl die derde rower ingestap het.

“Hulle het die vuurwapens op ons gerig en heeltyd gesê: ‘Waar is die geld? Ons gaan julle skiet, ons gaan julle doodmaak.’?”

Human en Olivier het die kasregisters oopgemaak. “Die twee langs ons het soos diere op die geld toegesak. Daarna het hulle met die geld uitgehardloop en ek het twee skote gehoor,” het sy gesê.

“Ek wou weghardloop en was op pad uit toe ek nog twee skote gehoor en deur die venster sien hoe Pieter neersak.”


Van agter doodgeskiet



2009-09-27 22:13

Virginia Keppler

Die 55-jarige mev. Isabel Schonken is die naweek op ’n kleinhoewe oos van Pretoria van agter doodgeskiet terwyl sy vermoedelik in haar huis se gastebadkamer vir haar moordenaars probeer wegkruip het.

Sy is die tweede persoon wat binne 24 uur in ’n gewapende plaasaanval in dié omgewing vermoor is. Nog twee mense is gewond en ernstig beseer in dié aanvalle.

Mnr. Lars Schonken (56), haar man en ’n sakeman, is in die bolyf geskiet in die aanval eergister om 02:00 naby Klipkop.

Mnr. Schonken se skedel en gewrig is ook gebreek toe die rowers hom aangerand en met ’n pistool gekap het. Hy sterk aan in die Little Company of Mary-hospitaal in Groenkloof, Pretoria.

Beswaarlik 24 uur vroeër is mnr. Sheun Anderson (18) Vrydag in die vroeë oggendure op ’n kleinhoewe by Wag-’n-bietjieskop, buite Bronkhorstspruit, ook in ’n plaasaanval doodgeskiet.

Oomblikke voordat hy geskiet is, moes sy ma, mev. Jeanine Anderson, toekyk hoe haar man, Robert (47), eienaar van ’n boumaatskappy, twee keer in die maag geskiet word.

Oor die tweede voorval het me. Héléne Rumsey (52), suster van mev. Schonken wat ’n klipgooi van die Schonken-egpaar woon, gesê die rowers het ’n elektriese heining wat reg om die kleinhoewe gespan is stukkend geknip. Hulle het deur ’n oop glasdeur by die huis ingekom.

“Hulle het Lars in die slaapkamer oorval,” het Rumsey vertel. “Dit wil voorkom of my sussie in die sitkamer voor die televisie aan die slaap geraak en wakker geskrik het toe hulle Lars skiet.

“Sy is kort daarna deur die hart geskiet.

“Die rowers het probeer om Lars ook deur die hart te skiet, maar dit was gelukkig net ’n vleiswond,” het Rumsey bygevoeg.

Mnr. Schonken het gevolglik sy bewussyn verloor. Toe hy kort daarna bykom, het hy sy pistool uit die kluis gaan haal en een van die rowers geskiet.

Hulle het volgens Rumsey met haar suster se handsak en selfoon en haar swaer se skootrekenaar gevlug.

Mnr. Schonken het sy dogter, mev. Sonja Smit, en haar man gebel. Hulle woon ook op die kleinhoewe. Smit se man, wat nie sy voornaam genoem wil hê nie, het sy bebloede skoonpa in die sitkamer en sy skoonma in die badkamer gekry. “Sy was reeds dood,” het hy gesê.

Hy het sy skoonpa na die hospitaal geneem.

Rumsey het gesê die egpaar se jongste dogter, Alma (17), was nie tydens die voorval tuis nie.

Sers. Monique Vermeulen, polisiewoordvoerder, het gesê die polisie het ’n bloedspoor tot by ’n grondpad naby die kleinhoewe gevolg waar die verdagtes moontlik in ’n voertuig geklim en gevlug het.

Die polisie het dokters en mediese personeel gevra om op die uitkyk te wees vir ’n man met ’n skietwond.

Volgens Rumsey het rowers twee weke gelede by háár huis probeer inbreek, maar die alarm het afgegaan en hulle het gevlug.




Lees die koerantberig hier